Інстытут палітычных даследаванняў "Палiтычная сфера"
Даследаванне прапануе падрабязны аналіз адукацыйнай міграцыі з Беларусі ў 35 краін Еўропы, Турцыю і Расію ў 2013–2025 гадах. За гэты перыяд колькасць беларускіх студэнтаў за мяжой у абсалютных лічбах знізілася (з каля 34 тыс. у 2013-м да 28,8 тыс. у 2023-м), але ў суадносінах з колькасцю студэнтаў унутры Беларусі іх доля прыкметна вырасла. Цяпер на аднаго студэнта за мяжой прыпадае прыкладна сем студэнтаў у Беларусі, дзесяць гадоў таму суадносіны складалі адзін да трынаццаці.
Кардынальна змяніліся кірункі міграцыі. Доля Расіі ўпала з 70% да 32% ад агульнай колькасці, а ў лідары вырвалася Польшча — з 11% да 44%. Значна выраслі долі іншых краін Усходняй і Цэнтральнай Еўропы — пры стагнацыі і скарачэнні ў Заходняй і Паўночнай Еўропе.
Даследаванне фіксуе важныя тэндэнцыі размеркавання беларускіх студэнтаў за мяжой і іх прычыны, што можа быць выкарыстана пры распрацоўванні адукацыйных і акадэмічных праграм. У канцы даследавання — асноўныя высновы і прагнозы.
