Інстытут палітычных даследаванняў "Палiтычная сфера"
Часопіс палітычных даследаванняў “Палітычная сфера”
Інстытут палітычных даследаванняў “Палітычная сфера”
Цэнтр Мілаша Універсітэта Вітаўта Вялікага
Серыя: гісторыя ідэй
Аднаўленне Гісторыі # 21 (2) 2013
Тэрмін падання матэрыялаў:
20 жніўня 2013 года
Планаваны час выхаду: канец 2013 года
“Палітычная сфера” – вядучае спецыялізаванае выданне па палітычных і сацыяльных навуках у Беларусі. Часопіс друкуе вынікі навуковых даследаванняў з розных галін палітычнай навукі і сумежных дысцыплін. Усе артыкулы часопіса праходзяць ананімнае акадэмічнае рэцэнзаванне. Адпаведнасць навуковым стандартам, а таксама эмпірычны ці тэарэтычны ўнёсак у разуменне палітыкі з’яўляюцца крытэрыямі для публікацыі. Выданне ўключанае ў шэраг міжнародных баз навуковых публікацый, у прыватнасці Central and Eastern European On–line Library, а таксама рэферуецца ў International Political Science Association (IPSA) Abstracts.
Часопіс выдаецца з 2001 года.
Асноўная тэма нумару – стратэгіі рэалізацыі гістарычнай палітыкі ў краінах Цэнтральна-Усходняй Еўропы, спецыфічныя і агульныя рысы працы з мінулым, узаемасувязь палітыкі памяці з шырэйшым кантэкстам палітычных і культурных трансфармацый посткамуністычных краін.
Плануецца, што аснову тэматычнага нумару “Палітычнай сферы” складуць матэрыялы канферэнцыі “Аднаўленне Гісторыі: памяць і грамадства ў Цэнтральна-Усходняй Еўропе”, якая адбылася ў Мінску 3-4 траўня 2013 г. Таксама мы запрашаем да публікацыі аўтараў, якія не бралі ўдзел у канферэнцыі, але гатовыя прадставіць артыкулы па палітыцы памяці.
Як павінна выглядаць нацыянальная дзяржава? Як фармаваць крытэры прыналежнасці да нацыі? Што сабою павінна ўяўляць культурная памяць? Як выбудоўваць адносіны з меншасцямі? І што ляжыць у аснове адносін з суседзямі – гістарычныя традыцыі сумеснага палітычнага жыцця, эканоміка, этнічная блізкасць?
Гэтыя пытанні не знаходзяць адназначнага адказу, спараджаючы мноства інтэлектуальных праектаў, генеруючы багацце дыскусій і сутыкненняў. Больш за тое, пытанні памяці і ідэнтычнасці ўсё больш актыўна выкарыстоўваюцца палітыкамі ў сваіх інтарэсах, што зусім не спрыяе паразуменню ні ўнутры краін, ні паміж суседзямі.
Асноўная праблематыка нумару:
1. Агульнае мінулае ці аўтаномныя нацыянальныя гісторыі? Памяць пра ВКЛ і Рэч Паспалітую ў дзяржавах Цэнтральна-Усходняй Еўропы.
2. Кастусь Каліноўскі і паўстанне 1863-1864 гадоў: канфлікт інтэрпрэтацый праз 150 гадоў.
3. Камуністычнае мінулае: паміж пераадоленнем і рэстаўрацыяй у посткамуністычных краінах.
Да друку прымаюцца матэрыялы на беларускай, рускай, англійскай, а таксама польскай і ўкраінскай мовах.
Артыкулы ў часопісе друкуюцца на беларускай і рускай мовах. Рэдакцыя самастойна ажыццяўляе пераклад.
Тэматыка матэрыялаў можа не супадаць з асноўнай тэмай нумару.
У рэдакцыю прадстаўляецца арыгінальны тэкст, які ніколі да таго не друкаваўся ні ў выглядзе асобнага артыкула, ні як частка манаграфіі.
Артыкулы, дасланыя ў рэдакцыю, праходзяць абавязковае ананімнае навуковае рэцэнзаванне.
Больш падрабязна пра патрабаванні і правілы афармлення глядзіце, калі ласка, тут: Palitycnaja_Sfera_2013_rules_be
Матэрыялы для друку ў №21 прымаюцца да 20 жніўня 2013 года.
Кантактны адрас е-mail: [email protected]
