Заснаванне Прэміі Кангрэса за найлепшую нямецкамоўную манаграфію на беларускую тэматыку

Арганізацыйны камітэт Міжнароднага Кангрэса даследчыкаў Беларусі абвяшчае пра заснаванне чарговай ганаровай Прэміі за найлепшую манаграфію на беларускую тэматыку – на гэты раз для нямецкамоўных аўтараў. У 2015 годзе надавалася ганаровая прэмія за англамоўную манаграфію (яе атрымала Маргарыта Бальмацэда), у 2016 годзе – за найлепшую польскамоўную манаграфію (узнагароджана Анна Энгелькінг).

Падсумаванне вынікаў конкурса сярод нямецкамоўных манаграфій запланавана падчас VII Міжнароднага Кангрэса даследчыка Беларусі, які будзе адбывацца 15-17 верасня 2017 года ў Варшаве.

Ганаровыя прэміі за іншамоўныя манаграфіі прадугледжваюцца для замежных даследчыкаў, якія не звязаныя ні паходжаннем, ні акадамічнай кар’ерай з Беларуссю.

У Германіі існуе сталая акадэмічная зацікаўленасць беларускай праблематыкай, што выяўляецца ў існаванні корпуса даследаванняў, тэматычных семінараў і канферэнцый, стыпендыяльных праграмаў, перакладаў. Адмыслова можна вылучыць выдавецкую серыю па гісторыі Беларусі, якую каардынуе Томас Бон (дзе выходзілі працы і беларускіх гісторыкаў). На беларускую мову перакладаліся фундаментальныя працы нямецкіх гісторыкаў Бернгарда К’яры, Райнэра Лінднэра, Томаса Бона, якія былі заўважнымі і інтэграванымі ў беларускую навуку. Стварэнне Прэміі для нямецкамоўных манаграфій мусіць падтрымаць і пашырыць ужо наладжаныя акадэмічныя сувязі, паспрыяць лепшаму веданню найноўшых даследаванняў і распрацовак на беларускую праблематыку ў Германіі.

Плануецца, што Прэмія будзе насіць ганаровы характар, гэта азначае, што не прадугледжваецца фінансавае ўзнагароджанне аўтару.

Для разгляду прымаюцца нямецкамоўныя манаграфіі, якія датычаць беларускай праблематыкі, што выйшлі на працягу 2011-2016 гадоў. Просьба дасылаць намінацыі на адрас: premija@palityka.org да 30 траўня 2017 года.

Склад экспертных радаў

Check Also

Канферэнцыя “Логас і патас: Гуманітарная рэфлексія ва ўмовах вайны” (Мінск, 28-29.10.2017)

Міжнародная асацыяцыя гуманітарыяў Еўрапейскі гуманітарны універсітэт (Вільнюс) Лятучы Універсітэт (Мінск) Цэнтр міждысцыплінарных гуманітарных даследаванняў (Мінск) ...

Яндекс.Метрика