Канферэнцыя ў Нотынгеме “Нацыянальныя дзяржавы паміж памяццю пра Другую сусветную вайну і сучаснай еўрапейскай палітыкай”

27-29 чэрвеня 2012 года ва Універсітэце Ноцінгэма (Англія) адбылася навуковая канферэнцыя пад назвай “Нацыянальныя дзяржавы паміж памяццю пра Другую сусветную вайну і сучаснай еўрапейскай палітыкай”. У асноўным на канферэнцыі абмяркоўваліся выкарыстанні Другой сусветнай вайны (і звязаных з ёю тэмаў генацыду, акупацыі, калабарацыі і супраціву) для артыкуляцыі палітычных пазіцый у сучасным кантэксце. У канферэнцыі прынялі ўдзел 30 навукоўцаў з Еўропы і Амерыкі, які аналізавалі “палітыку памяці” ў яе разнастайных вымярэннях – палітычных маніфестах, урачыстых рытуалах, медыйным дыскурсе, школьных падручніках, штодзённых практыках.

У канферэнцыі браў удзел і супрацоўнік Інстытута “Палітычная сфера” Аляксей Ластоўскі, які прэзэнтаваў даклад на тэму “Нацыяналізацыя савецкага міфа: памяць пра Другую сусветную вайну ў сучаснай Беларусі”. Агульнавядома, што міф Перамогі стаў магутным інструментам гістарычнай палітыкі для беларускай улады, і розныя аспекты ажыццяўлення гэтай палітыкі і яе аспрэчвання ўжо аналізаваліся шматлікімі навукоўцамі (Д. Марплз, П. А. Рудлінг, У. Падгол, Б. Торнквіст-Плева, А. Партноў, А. Гужон). У дадзеным жа дакладзе больш увагі надавалася пытанню пераемнасці савецкага вобразу вайны ў сучаснай Беларусі, яго функцыянальнаму значэнню для кантэкстуальных і сітуацыйных мэтаў. Таксама быў прыцягнуты разнастайны сацыялагічны матэрыял, які ў значнай ступені карэктуе распаўсюджаную “элітарысцкую” мадэль для аналізу палітыкі памяці, калі ў разлік бяруцца толькі інтарэсы ўлады, без уліку распаўсюджаных калектыўных уяўленняў, якія насамрэч накладваюць сур’ёзныя абмежаванні для актараў гістарычнай палітыкі.

Check Also

Аналітычная папера пра грамадскія ацэнкі сістэмы адукацыі ў Беларусі

Прадстаўляем вашай увазе аналітычную паперу па выніках сацыялагічнага даследвання, ажыццёўленга ў жніўні 2023 года. У ...