Канферэнцыя “Логас і патас: Гуманітарная рэфлексія ва ўмовах вайны” (Мінск, 28-29.10.2017)

Міжнародная асацыяцыя гуманітарыяў Еўрапейскі гуманітарны універсітэт (Вільнюс) Лятучы Універсітэт (Мінск) Цэнтр міждысцыплінарных гуманітарных даследаванняў (Мінск) Інстытут “Палітычная сфера” (Мінск-Вільнюс) абвяшчаюць прыём заявак на міжнародную навуковую канферэнцыю Логас і патас: Гуманітарная рэфлексія ва ўмовах вайны Мінск, 28-29 кастрычніка 2017 г. “Неабвешчаная вайна” ва Украіне, якая разгарнулася як у рэальным, так і ў віртуальным (медыйным) вымярэннях, прывяла да надзвычайнага нагнятання рыторыкі вайны ва ўсім ўсходнееўрапейскім рэгіёне.

У ацэнцы і аналізе таго, што адбываецца, намецілася сымптаматычныя тэндэнцыя: паўсюдна (не толькі ў выступах палітыкаў і грамадскіх дзеячаў, але таксама і ў публікацыях гуманітарыяў) першасным пытаннем усё часцей становіцца абмеркаванне розных сцэнарыяў новай магчымай вайны і/або акупацыі.

Грамадская думка нібы рухаецца па коле: ад вайны сапраўднай – да вайны ўяўнай – і ў адваротны бок; вырабляючы ў гэтай мілітарысцкай «гонцы» не толькі неабходныя (квазі) рацыянальныя абгрунтаванні, але і адпаведныя ім афекты ў духу a “la guerre comme a la guerre”.

У гэтым кантэксце непазбежна становіцца ўсё меней выразнай і, разам з тым, усё больш запатрабаванай інтэлектуальная перспектыва іншага роду – перспектыва, здольная разгарнуцца па-за азначанага колазвароту ваеннай рыторыкі і паставіць пад пытанне вайну як idée fixe нашай сучаснасці.

Мяркуецца, што гуманітарныя навукі валодаюць значным метадалагічным рэсурсам і аналітычным досведам для рэалізацыі названай вышэй задачы.

У гэтай сувязі заяўленая канферэнцыя накіравана на стварэнне пляцоўкі (форуму) для гуманітарнага асэнсавання актуальнай сацыяльна-палітычнай сітуацыі ў рэгіёне і на ўзмацненне сацыяльнага значэння (рэзанансу) гуманітарнай рэфлексіі ва ўмовах нашага ваеннага часу.

Адным з найбольш вострых пытанняў, з якім сутыкаецца сёння гуманітарная думка, з’яўляецца яе ўласны патас, які сведчыць аб афектыўных счэпках з рэальнасцю вайны і тым самым – аб немагчымасці «безуважнага» мыслення.

У гэтых адносінах мэтай канферэнцыі з’яўляецца высвятленне эмацыйных дыспазыцый інтэлектуальнай працы, здольнай пракладваць свой шлях па-за рамкамі/логікай ідэалагічнага супрацьстаяння і фармаваць дзейсную альтэрнатыву прапагандзе.

На канферэнцыі плануецца абмеркаваць наступныя пытанні: – гуманітарныя даследаванні ў сітуацыі «антрапалагічнага шоку»; – публіцыстыка ва ўмовах гібрыднай/інфармацыйнай вайны; – дыскурсы вайны і ўмовы іх вытворчасці і ўзнаўлення; – антыпрапагандыскі патэнцыял гуманітарыстыкі; – культурныя/мастацкія практыкі як дэканструкцыя вайны; – межпакаленніцкія разломы пост-савецкага ваеннага часу; – кроскультурная камунікацыя як рэсурс палітычнага абнаўлення ва ўсходнееўрапейскіх краінах; – палітычныя эмоцыі; – канструяванне выяваў ворага і рыторыка нянавісці ў СМІ і сацыяльных медыя.

Заяўкі на ўдзел у канферэнцыі могуць быць двух відаў: (1) заяўка на выступ з дакладам, (2) заяўка на арганізацыю дыскусіі.

Заяўка павінна ўключаць наступную інфармацыю: імя / прозвішча, навуковая ступень, інстытуцыялізацыя (калі ёсць), сяброўства ў МАГ (калі мае месца), е-мэйлы, назву і анатацыю дакладу (300-400 слоў) або назву і апісанне дыскусіі (200-300 слоў).

Пры падачы заяўкі на арганізацыю дыскусіі неабходна ўказаць адпаведныя дадзеныя, як мінімум, 3 удзельнікаў (уключаючы заяўніка).

Для падачы заяўкі неабходна запоўніць электронную форму па спасылках: Paper (https://docs.google.com/forms/d/e/1FAIpQLSc7KI4Mm0Zkrc7xO8dznsDVznF2vGVGIhN-tr0DAEiQZEi0RA/viewform) (даклад) / Discussion (https://docs.google.com/forms/d/e/1FAIpQLSdFTi71lveWyASVot6HSya4LVYgA_aSlxKlEQfi5Qzw64rV_g/viewform) (дыскусія).

Заяўкі прымаюцца да 10 жніўня 2017 г.

Пра вынікі адбору заявак будзе паведамлена не пазней за 1 верасня 2017 г.

Працоўныя мовы канферэнцыі: беларуская, руская, украінская.

Арганізатары забяспечваюць пражыванне іншагароднім ўдзельнікам, чые выступы ўключаны ў праграму канферэнцыі.

Аргкамітэт канферэнцыі: Таццяна Вадалажская (Мінск), Георгій Касьянаў (Кіеў), Аляксандр Міхайлоўскі (Масква), Андрэй Казакевіч (Мінск), Таццяна Чуліцкая (Вільнюс/Мінск), Таццяна Шчытцова (Вільнюс/Мінск).

Па дадатковую інфармацыю звяртайцеся па адрасе [email protected]