Канферэнцыя “Чарнобыльская аварыя і грамадства: 30 год пасля катастрофы”

111

МГА «ГІСТОРЫКА» (Менск)

БЕЛАРУСКІ АРХІЎ ВУСНАЙ ГІСТОРЫІ (Менск)

ІНСТЫТУТ СЛАВІСТЫКІ ПОЛЬСКАЙ АКАДЭМІІ НАВУК (Варшава)

ЛЯТУЧЫ ЎНІВЕРСІТЭТ (Менск)

 Запрашаюць да ўдзелу ў міжнароднай навуковай канферэнцыі

«Чарнобыльская аварыя і грамадства: 30 год пасля катастрофы»

(Менск, 15-16 красавіка 2016 г.) 

Трыццацігоддзе аварыі на Чарнобыльскай АЭС павінна стаць нагодай для пэўнай “інвентарызацыі” нашых ведаў па праблеме чалавека і грамадства ў “постчарнобыльскім свеце” і, магчыма, для вызначэння новых накірункаў даследаванняў. Не сакрэт, што па шэрагу прычын гэтая катастрофа і яе наступствы ў Беларусі аказаліся адсунутымі на перыферыю грамадскай і навуковай зацікаўленасці. Аднак, як паказалі даследаванні Беларускага архіва вуснай гісторыі (2015), Чарнобыль па-ранейшаму адгукаецца вялікім болем у памяці тых, каго закранула гэтая трагедыя. Адначасна яна падкрэслівае значэнне сацыяльных і гуманітарных навук, а таксама адказнасць навукоўцаў за тое, што адбываецца з чалавекам і грамадствам у сітуацыі глабальнай катастрофы.

Запрашаем навукоўцаў паспрабаваць адказаць на наступныя пытанні:

  • Якія сацыяльныя і палітычныя наступствы мела аварыя на Чарнобыльскай АЭС для грамадства Беларусі і ўсяго постсавецкага рэгіёну?
  • Як паўплывала гэтая аварыя на развіццё сацыяльных і гуманітарных навук?
  • Як Чарнобыльская катастрофа і яе наступствы адлюстраваліся ў памяці і культуры народаў Беларусі, Украіны і Расіі?

Канферэнцыя будзе мець шматдысцыплінарны характар. Мы разлічваем  на ўдзел у ёй гісторыкаў, культуролагаў, палітолагаў, сацыёлагаў, літаратуразнаўцаў, а таксама прадстаўнікоў іншых сацыяльных і гуманітарных навук.

Плануецца праца двух сесій:

  • Чалавек, грамадства, дзяржава праз 30 год пасля Чарнобыльскай катастрофы 
  • Памяць і рэфлексія: Чарнобыль у люстэрках памяці і культуры

Працоўныя мовы канферэнцыі – беларуская, украінская, руская, польская і англійская.

Заяўкі на ўдзел просім дасылаць да 31 студзеня 2016 г. на адрас: kanferencyja@nashapamiac.org. У заяўцы трэба пазначыць навуковую ступень, месца працы, тэму даклада і тэзісы (не больш 2 тыс. знакаў), кантактны тэлефон і адрас электроннай паштовай скрыні.

Аргкамітэт пакідае за сабой права адбору заявак. Матэрыялы канферэнцыі будуць апублікаваныя. Арганізатары кампенсуюць выдаткі на праезд і пражыванне ўдзельнікаў канферэнцыі.

Просім пераслаць інфармацыю ўсім зацікаўленым асобам.

Аргкамітэт канферэнцыі:

Доктар гіст. навук Алесь Смалянчук,

Мгр Уладзімір Валодзін

Мгр Ганна Кавалёва

Мгр Андрэй Мастыка

Павел Сітнік

Check Also

Аб’яўленне збору публікацый на прэмію Кангрэса адкладаецца да 20 лютага 2019

Аб’яўленне збору намінацый намінацый на Прэмію за найлепшую навуковую публікацыю ў галіне сацыяльных і гуманітарных дысцыплін ...

Яндекс.Метрика